(Firda)

Dei aller fleste som skal kjøpe seg bil ville nok heldt seg langt unna bilar frå lista av «verdas verste bilar nokosinne». Men David Holst frå Naustdal lét seg ikkje skremme av den tittelen, heller motsett. Han har nyleg har kjøpt seg veteranbilen Morris Marina, 1,3 super frå 1977.

– Den vart kritisert frå dag éin, fordi det var ein så enkel og gammaldags bil, med dårleg kvalitet og dårlege køyreeigenskapar, seier Holst.

For Holst er dette draumebilen.

– Eg har sansen for engelske bilar. Alle vil ha feite amerikanske bilar, som Chevrolet eller Cadillac. Men ein Morris ser ein nesten aldri, seier Holst.

Trass dei dårlege køyreeigenskapane og eit dårleg rykte var Morrs Marins ein salssuksess, spesielt i Storbritannia, men også elles i Europa.

Det blei selt over 800.000 Morris Marina i Storbritannia frå 1971 til 1980. No er bilen sjeldan vare, og i dag er det berre rundt 390 av den på engelske vegar.

– I Norge er det veldig få av den igjen. Dette er truleg den einaste som er på vegane i Sogn og Fjordane, seier Holst.

– Berre måtte ha den

Holst hadde vore på utkikk etter ein Marina i ei stund, då det plutseleg dukka opp ein på Finn.

– Eg berre måtte ha den. Eg henta den usett, seier han.

For Holst starta interessa for veteranbilar etter ein tur til Førde med ein kompis.

– Ein kompis hadde kjøpt seg ein fransk veteranbil og ville ha med meg på køyretur. Så vi reiste til Førde og kjøpte milkshake. Eg vart heilt betatt etter den turen og tenkte at eg også måtte ha meg ein veteranbil. Så eg begynte å sjå etter veteranbil allereie dagen etterpå, seier han.

Holst seier at det er ein del engelske bilar i veteran-miljøet i Naustdal, og det var slik han fekk auga opna for engelske.

Dette er den andre engelske veteranbilen til Holst. Frå før har han ein Austin Maxi, som han no prøver å få selt. Han ser ikkje vekk frå at det blir fleire veteranbilar etter kvart.

– Vi får sjå kva framtida bringar, men ein skal jo ha plass til det òg.

Får mykje merksemd

Holst seier at Marinaen er ein bil som trekk mykje merksemd.

– Det er mange som har komme bort til meg fordi dei hugsar bilen frå dei var unge. Denne bilen var allemannseige på 70- og 80- talet, ein heilt vanleg familiebil. Men no er det nesten ingen igjen. Det er stas å kunne køyre rundt i ein så gammal bil, som mange hugsar, seier Holst.

– Det er fleire som har spurt om å få sette seg ned i den, for å hugse korleis det var. Dei yngre trur det er ein Opel, seier Holst.

– Litt tosken å køyre

– Korleis er det å køyre den?

– Den dreg godt, men girsystemet gjer at den er litt tosken å køyre. Og dei designa ein for stor motor til bilen, som gjer at den har ein tendens til å overstyre når den køyre i over 80 km/t, seier Holst.

– Har du opplevd at den overstyrer?

– Eg har ikkje køyrt den i over 80. Veteranbilar skal ikkje køyrast fort, seier han.

Ein av Marinas sterke sider er bagasjerommet på 552 liter. Her har Holst alltid ei bensinkanne, i tilfelle bilen skulle gå tom. Bensin-indikatoren er nemleg ikkje heilt til å stole på.

Sidan han fekk bilen har han gjort nokre justeringar. Blant anna har han installert ny grill og frontfangar, med god hjelp frå ein kompis.

– Det er ein gammal bil, så ein må rekne med at det blir litt skruing. Sjølv er eg ikkje så flink til å skru, men eg har lært mykje om motor sidan eg fekk den, seier han og legg til:

– Bilen kan jo stoppe når som helst, så ein må vite korleis ein får den i gang igjen.

No håpar Holst å få brukt bilen i Trøkk n Truck-konvoien.

– Eg køyrer den berre på finvêrsdagar. Den har ikkje dei beste køyreeigenskapane i regn, seier han.

Sjå fleire bilde: